Rivadulla e Agoraphobia subirán o volume do Atlantic Pride.

Este martes 8 de Xullo Agoraphobia e Rivadulla subiranse ao escenario da praza de Pontevedra.

O Atlantic Pride continúa a súa andaina na Praza de Pontevedra con tres novas propostas musicais de alta voltaxe para este martes, 8 de xullo. Nesta terceira xornada do ‘Orgullo do Norte’ coruñés chegaralle a súa quenda a dúas agardadas bandas galegas: Agoraphobia e máis a Rivadulla. A troupe de rock alternativo nada en Boiro regresou a comezos de ano ás ondas con Eyes Never Lie, o primeiro avance do seu novo álbum, que o público do Atlantic Pride poderá escoitar ao vivo desde ás 22.30 horas, como testemuña de toda a súa intensidade e as súas letras profundas, nun grito contido entre o medo e o desexo de Agoraphobia de arriscar de novo.

 O seu potente rock estará precedido sobre as táboas da Praza de Pontevedra coas cancións sentimentais, pero cargadas de rabia existencial, de Rivadulla (21.00 horas) e a súa mestura do pop dos 2000, a música electrónica con toques indies e o trap, nun concepto que o propio artista define como “parkineo marika”. Finalmente, aos pratos se situará DJ Licho, para abrir e pechar a xornada ás 20.00 e ás 23.30 horas respectivamente, ao ritmo dos grandes himnos das divas máis universais do pop internacional máis bailable.

PROGRAMA ATLANTIC PRIDE 2025 Martes, 8 de xullo

Praza de Pontevedra
20.00h. DJ Licho
21.00h. Rivadulla
22.30h. Agoraphobia
23.30h. DJ Licho