OUR FEST reúne a máis de tres mil persoas en Expourense na celebración da súa quinta edición

O certame ourensán consolida o seu formato de escenario único con actuacións de The Jesus and Mary Chain, Fat Dog e The Dream Syndicate

A quinta edición de OUR FEST congregou a máis de 3.000 espectadores no recinto de Expourense, consolidando un modelo organizativo sustentado nun único escenario cuberto, máis de oito horas de música continuada e a ausencia de solapamentos entre actuacións. A cita logrou facer convivir diferentes vertentes da música alternativa ao longo de varias xeracións.

A xornada musical deu comezo tras a apertura de portas coa intervención de Germán Salto, quen despregou un repertorio de corte power pop e rock clásico centrado nas composicións do seu cuarto traballo de estudio, "Ojo de bife". A continuación, a banda galega Triángulo de Amor Bizarro tomou o testemuño en formato trío para defender o material de "Mi Catedral", o seu sétimo disco e a primeira entrega firmada conxuntamente por Rodrigo Caamaño, Isa Cea e Rafa Mallo. Entre os diferentes pases do cartel, Albert Petit DJ foi o encargado de vertebrar os tempos de cambio mediante seleccións sonoras encamiñadas cara ao punk, a música negra e o pop de guitarras.

Foto: Sergio Albert

O apartado internacional tivo un punto de inflexión coa presenza de The Dream Syndicate na que supuxo a súa única data en España durante 2026. A formación capitaneada por Steve Wynn ofreceu unha actuación caracterizada pola interacción directa sobre o escenario e a ausencia de auriculares internos, abrindo con "Halloween" e concluíndo coa extensión instrumental de "John Coltrane Stereo Blues". Seguidamente, a agrupación estadounidense The Mystery Lights imprimiu maior velocidade á noite mediante un pase de garage punk e psicodelia centrado na presentación do seu álbum "Purgatory".

O tramo final do festival estivo encabezado polos escoceses The Jesus and Mary Chain, quen repasaron clásicos como "April Skies" ou "Happy When It Rains" xunto a cancións do seu recente traballo "Glasgow Eyes". Durante a súa actuación produciuse a colaboración de Isa Cea, vocalista de Triángulo de Amor Bizarro, quen subiu ao escenario para interpretar conxuntamente as pezas "Sometimes Always" e "Just Like Honey" antes do peche con "Reverence". A xornada concluíu co debut en Galicia do grupo británico Fat Dog, que transformou o recinto nuna pista de baile dominada polo electropunk, o techno e o rock industrial, anticipando pasaxes do seu próximo disco "Cancel Me (I’m Tired)" ata pasada a medianoite.