Exeria abraza o britpop en 'Demasiado gris', o seu sinxelo máis luminoso

O cuarteto de Ponteareas alíase co produtor británico Nick Brine e presenta un videoclip dirixido por Izanmg antes do seu dobrete en Neda e Noia

Exeria, unha das formacións de referencia do rock alternativo galego, vén de publicar "Demasiado gris", un novo sinxelo co que abren unha etapa caracterizada por unha sonoridade máis viva e luminosa. Despois de cinco anos explorando os terreos do grunge, do noise e do rock de guitarras distorsionadas desde a súa fundación en 2021, o cuarteto de Ponteareas achégase nesta ocasión ás influencias do britpop sen perder a enerxía melódica que define a súa identidade.

O tema contou coa produción do galés Nick Brine, recoñecido polo seu traballo con bandas históricas como Oasis, Coldplay, Primal Scream ou Stereophonics. Esta alianza terá continuidade no seu próximo EP de catro temas, gravado en Alacante e previsto para finais de 2026. No plano lírico, "Demasiado gris" aborda o distanciamento maduro e sen rancor entre dous amigos ao tomar camiños vitais diferentes, un relato que se transforma no seu videoclip oficial —dirixido polo realizador Izanmg— noutra narrativa de corte estrambótico onde os membros do grupo participan nun concurso subterráneo de baile.

Cunha traxectoria avalada por recoñecementos como o triunfo no concurso Trece Roeis Fest e pasos por salas como a Capitol, Clavicémbalo, La Fábrica de Chocolate ou Auriense, a banda continúa a defender o seu directo no circuíto galego.