Calllejo e Lontreira unen forzas en ‘Quen gañou?’

Tras presentar ‘Déixame bailar (Queimadura)’, primeiro adianto do seu álbum debut "Moscoso", Calllejo publica xunto ao trío Lontreira o enérxico ‘Quen gañou?’. O álbum preséntase en directo en La Fábrica de Chocolate (Vigo) o xoves 23 de abril, o mesmo día que sae a luz

Calllejo, o proxecto en solitario do músico e produtor vigués Adrián Callejo, iniciou a comezos de abril o seu camiño discográfico co lanzamento de ‘Déixame bailar (Queimadura)’, o primeiro adianto de "Moscoso", o seu álbum debut, que verá a luz o vindeiro 23 de abril de 2026.

Agora únese a Lontreira, trío de electropop formado por Adri Cores, Héctor Rodríguez e Iván Barral, para presentar ‘Quen gañou?’, un tema enérxico cunha desas melodías que quedan na cabeza.

Se ‘Déixame bailar’ é a certeza, ‘Quen gañou?’ é a dúbida. A través desta pregunta retórica, Calllejo pon voz a esa sensación universal de non saber se o vivido foi real ou foi algo que construído na imaxinación.  

 O retrouso repite "quen gañou" case como un eco que rebota nunha habitación baleira. Porque nunha ruptura así, ambigua e sen peche, ninguén gaña. Non hai vencedor cando un segue esperando e o outro xa desapareceu. ‘Quen gañou?’ non é unha canción de desamor ao uso. É unha canción sobre a confusión, sobre esas relacións que nunca se definen e por iso nunca rematan de todo. Sempre queda a pregunta aberta flotando.